مقبوضہ بیت المقدس – (فلسطین نیوز۔مرکز اطلاعات) اسرائیلی وزیراعظم بنجم نیتن یاھو افریقی قیادت کو بلیک میل کرنے اور ان کے سامنے صیہونی ریاست کی ساکھ بہتر بنانے کے مشن پر کینیا پہنچ گئے ہیں۔
فلسطین نیوز کو موصول ہونے والی اطلاعات کے مطابق نیتن یاھو کل منگل کو جمہوریہ کینیا کے دورے پر روانہ ہوئے جہاں وہ کینیا کے نو منتخب صدر اوھورو کینیان کی تاج پوشی کی تقریب میں شرکت کریں گے۔عبرانی زبان میں شائع ہونے والے اخبار ’ہارٹز‘ نے اپنی رپورٹ میں بتایا ہے کہ نیتن یاھو افریقی ملکوں یوگندا اور روانڈا کے صدور سے بھی ملاقات کریں گے۔ ان دونوں ملکوں نے اسرائیل میں پناہ گزین کے طور پر رہنے والے اپنے شہریوں کو نکال باہر کرنے سے اتفاق کیا ہے۔
کینیا کے صدر کی تقریب حلف بردار میں نیتن یاھو تنزانیا، یوگنڈا، زمبیا، روانڈا، توگو، بوٹزوانا، نامبیا، ایتھوپیا اور نائیجیریا کے نائب صدر سے بھی ملاقات کریں گے۔
اسرائیل کی حکمراں جماعت ’لیکوڈ‘ کے پارلیمانی بلاک کی طرف سےحال ہی میں جاری کردہ ایک بیان میں کہا گیا تھا کہ وزیراعظم نیتن یاھو ڈیڑھ سال میں افریقہ کے تیسرے دورے پر جائیں گے۔ بیان میں کہا گیا تھا کہ نتین یاھو کا افریقی ملکوں کا تیسرا دورہ صیہونی ریاست اور افریقی ممالک کے درمیان بڑھتے تعلقات کا واضح ثبوت ہے۔