مقبوضہ بیت المقدس – (فلسطین نیوز۔مرکز اطلاعات) اسرائیلی حکام نے مسجد اقصی کی نگرانی کے واسطے اتوار کی صبح کیمروں اور دھاتوں کا انکشاف کرنے والے آلات کی تنصیب کا کام شروع کر دیا ہے۔
فلسطین نیوز کو موصول ہونے والی اطلاعات کے مطابق حکام کی جانب سے دھات کا انکشاف کرنے والے آلات مسجد اقصی کے متعدد دروازوں پر نصب کیے جا رہے ہیں جن میں باب اسباط اور باب مجلس شامل ہیں۔رپورٹ کے مطابق قابض اسرائیلی پولیس دروازوں کے نزدیک کیمروں کو نصب کرے گی تا کہ مسجد اقصی کے صحنوں ہونے والے واقعات پر نظر رکھی جا سکے۔ یہ اقدام جمعے کے روز مسجد کے حرم کے اندر تین فلسطینیوں کے جاں بحق ہونے کے بعد کیا جا رہا ہے۔
واضح رہے کہ اسرائیل نے چند ماہ قبل ان اقدامات کو کرنے کی کوشش کی تھی تاہم فلسطینی اور اردنی جانب سے مسترد کیے جانے کے بعد اسرائیلی حکام پیچھے ہٹ گئے تھے۔