رپورٹ کے مطابق فلسطینی صحافتی حلقوں کی جانب سے العربیہ نیوز چینل کی پالیسی کی مذمت کرتے ہوئے اسے اسرائیل نوازی پرمبنی قرار دیتے ہوئے کہاہے کہ العربیہ چینل فلسطینی تحریک آزادی، تحریک مزاحمت اور فلسطینیوں کی قربانیوں کی توہین کا مرتکب ہو رہا ہے۔
غزہ کی پٹی میں فلسطینی جرنلسٹ بلاک کی جانب سے جاری ایک بیان میں کہا گیا ہے کہ "العربیہ” نیوز چینل نے اپنے خبروں کے انداز سے یہ ثابت کیا ہے کہ وہ فلسطینیوں کی تحریک آزادی کی حمایت کے بجائے اسرائیلی مظالم کی حمایت کررہا ہے۔ بیان میں کہا گیا ہے کہ "العربیہ” کی جانب سے اپنے دفاع میں لڑںے والے مظلوم فلسطینیوں کو”ظالم حملہ آور” جیسی اصطلاحات استعمال کرکے فلسطینی عوام کے زخموں پر نمک پاشی کی جا رہی ہے۔
بیان میں کہا گیا ہے کہ عرب اور اسلامی دنیا کی نمائندگی اور ترجمانی کرنے والے کسی عالمی نشریاتی ادارے کو فلسطینیوں کے ساتھ ایسا معاندانہ طرز عمل زیب نہیں دیتا۔ العربیہ کی رپوٹنگ سے ایسے لگ رہا ہے کہ یہ عرب دنیا کا نہیں بلکہ صہیونی ریاست کا چینل ہے جو فلسطینی مظلوموں کو بھی "ظالم” قرار دیتا ہے۔
خیال رہے کہ حال ہی میں فلسطین کے مقبوضہ مغربی کنارے اور مقبوضہ بیت المقدس میں فلسطینی شہریوں کی جانب سے یہودی آباد کاروں پر چاقو سے حملوں پر العربیہ نیوز چینل نے فلسطینی حملہ آوروں کو”شدت پسند” اور زیادتی کے مرتکب” قرار دیتے ہوئے غیر ارادی طورپر اسرائیل کی پالیسی کی حمایت کی تھی جس پر فلسطین بھرمیں سخت وغم وغصے کی لہر دوڑ گئی تھی۔
العربیہ نیوز چینل خلیجی ممالک کی نمائندگی کرتا ہے، مگر اس کی پالیسی میں قضیہ فلسطین کوئی خاص اہمیت نہیں رکھتا ہے۔