(روز نامہ قدس ۔آنلائن خبر رساں ادارہ )لبنان کے شہر بیروت میں عرب پاپولر فورم کے زیر اہتمام منعقدہ کانفرنس کے شرکا نے متفقہ طور پر امریکہ کی اقتصادی کانفرنس کو مسترد کرتے ہوئے فلسطینی عوام کی جدوجہد آزادی کا ساتھ دینے کا اعلان کیا ہے۔
تفصیلات کے مطابق بیروت میں ہونے والی کانفرنس کے اختتام پر اعلان بیروت کے نام سے ایک اعلامیہ جاری کیا گیا جس میں نام نہاد امریکی منصوبے کے خلاف آئندہ لائحہ عمل طے کرنے کا اعلان کیا گیا۔
اعلامیے میں مزید کہا گیا کہ کانفرنس فلسطینیوں کی مسلح جدو جہد آزادی سمیت مزاحمت کی تمام اشکال کی مکمل حمایت کا اعلان کرتی ہے۔
اور کانفرنس کے شرکا پوری امت مسلمہ ،مسلم ممالک کی افواج اور تمام عالم انسانیت سے یہ درخواست کرتی ہے کہ وہ مظلوم فلسطینی عوام کا ساتھ دیں۔
اس سے پہلےکانفرنس میں شریک مختلف ممالک کے وفود نے امریکی سازش کا ناکام بنانے کے لیے تبادلہ خیا ل کیا، کانفرنس میںصدی کی ڈیل کے خلاف ہونے والے سابقہ اقدامات، موجودہ اور آئندہ کے لائحہ عمل پرغور کیا گیا۔
یادرہے کہ اس کانفرنس کا انعقاد عرب قومی کانفرنس، اسلامی قومی کانفرنس، عرب جنرل پارٹیز کانگرس، بین الاقوامی القدس فائونڈیشن اور عرب پروگریسیو فرنٹ کی دعوت پر ہوا تھا۔ جس میں فلسطین، لبنان اور دوسرے عرب اور مسلمان ممالک کے300 سے زاید مندوبین نے شرکت کی۔
کانفرنس میں اسلامی تحریک مزاحمت’حماس’ کے سایسی شعبے کے رکن حسام بدران، لبنان میں حماس کے مندوب احمد عبدالھادی، حماس رہ نما علی برکہ، تحریک فتح کی مرکزی کمیٹی کے رکن عزام الاحمد، روحی فتوض اور عباس زکی نے شرکت کی۔