برسلز (فلسطین نیوز۔مرکز اطلاعات) بیرون ملک مقیم فلسطینیوں اور انسانی حقوق کے کارکنوں نے مشترکہ مساعی سے بیلجیم کے دارالحکومت برسلز میں یورپی یونین کے صدر دفتر کے سامنے 4500 فلسطینی شہداء کی ایک تاریخی یادگار قائم کی ہے جس نے تحریک آزادی فلسطین کو یورپ میں امر کر دیا ہے۔
فلسطین نیوز کو موصول ہونے والی اطلاعات کے مطابق اس تاریخی یادگار شہداء میں ان 4500 فلسطینی شہداء کے نام شامل کیے جو سنہ 2008ء کے بعد سے اسرائیلی فوج کی کارروائیوں کے دوران غزہ کی پٹی میں شہید کیے گئے۔یادگار شہداء پر شہداء کے ناموں کے ساتھ جوتے بھی رکھے گئے ہیں جواس بات کی علامت ہیں کہ ان جوتوں کے مالکان کو شہید کردیا گیا ہے۔ اس یادگار شہداء سے یورپی یونین کے رکن 28 ممالک کے وزراء خارجہ کی آمد ورفت بھی رہے گی۔
خایل رہے کہ اسرائیلی فوج نے 2008ء، 2009ء، 2012ء اور 2014ء کے دوران غزہ کی پٹی پر وسیع پیمانے پر جنگ مسلط کی جس کے نتیجے میں ہزاروں فلسطینی شہید اور زخمی ہوگئے۔
حال ہی میں 30 مارچ کو غزہ میں شروع ہونے والے عظیم الشان واپسی مارچ شروع ہونے کے بعد اب تک 120 فلسطینی مظاہرین شہید کیے جا چکے ہیں۔