فلسطین کے مقبوضہ مغربی کنارے کے شمالی شہر نابلس میں ہفتے کو علی الصباح اسرائیلی فوج اور پولیس نے مشترکہ سرچ آپریشن شروع کیا جس میں کم سے کم 9 فلسطینی گرفتار اور تشدد کے نتیجے میں 14 افراد زخمی ہوئے ہیں۔
عینی شاہدین نے بتایا کہ نابلس میں الضاحیہ کالونی اور روجیب میں متمرکز اسرائیلی فوجیوں نے شہر میں گھر گھر تلاشی کا سلسلہ شروع کیا توفلسطینی شہری اس کے خلاف گھروں سے باہر نکل آئے۔ مظاہرین نے قابض فوج کے خلاف شدید نعرے بازی بھی کی۔ اس موقع پر اسرائیلی فوجیوں نے نو فلسطینیوں کو حراست میں لیا جب کہ تشدد کے نتیجے میں چودہ افراد زخمی ہوئےہیں۔گرفتار کیے جانے والے شہریوں کی شناخت عبدالکریم انور منی، الاشقاء زاھی، سمیر ، عبداللہ الکوسا، راغب علیوی ،راسم خطاب یحیٰ الحج حمد، عبدالرحمان الحج حمد، اوربسام ابو غزالہ کے ناموں سے کی گئی ہے۔
عینی شاہدین نے بتایا کہ اسرائیلی فوجی فلسطینی شہریوں کے گھروں کے دروازے توڑ کر اندر داخل ہوئے اور گھروں کی چھتوں پر گھنٹوں پوزیشنیں سنھبالے رہے۔ تلاشی کی کارروائی میں نہ صرف شہریوں کو زدو کوب کیا گیا بلکہ قیمتی سامان کی توڑپھوڑ اور نقدی اورزیوارت لوٹ لیے۔