برسلز (فلسطین نیوز۔مرکز اطلاعات) یورپی یونین کی پارلیمنٹ نے فلسطین کے علاقے غزہ کی پٹی پر گیارہ سال سے مسلط معاشی ناکہ بندی فوری اور غیر مشروط طورپر ختم کرنے کا مطالبہ کیا ہے۔ یورپی پارلیمان نے غزہ کی پٹی میں حق واپسی کے لیے احتجاج کرنے والے نہتے فلسطینی مظاہرین کے قتل عام کا سلسلہ بند کرانے اور قتل کے واقعات کی جامع تحقیقات کا مطالبہ کیا ہے۔
فلسطین نیوز کو موصول ہونے والی اطلاعات کے مطابق برسلز میں ہونے والے یورپی پارلیمنٹ کے اجلاس میں فلسطین کی مشرقی سرحد پر احتجاجی مظاہرے کرنے والے فلسطینیوں کے خلاف طاقت کے استعمال کی شدید الفاظ میں مذمت کی گئی۔اجلاس کے بعد جاری کردہ ایک بیان میں کہا گیا ہے کہ یورپی یونین غزہ کی مسلسل ناکہ بندی کو تشویش کی نگاہ سے دیکھتی ہے۔ ہمارا مطالبہ ہے کہ غزہ کی پٹی کے عوام پر مسلط کردہ پابندیاں فوری اور غیر مشروط طور ختم کی جائیں۔
اس موقع پر ایک قرارداد پیش کی گئی جس میں غزہ کی پٹی میں حق واپسی کے لیے احتجاج کرنے والے فلسطینیوں کے قتل عام کی تحقیقات کرانے اور قتل عام کا سلسلہ بند کرانے پر زور دیا گیا۔ قرارداد کی حمایت میں 524 ارکان نے رائے دی جب کہ صرف 30 ارکان نے اس کی مخالفت کی۔
یورپی پارلیمان نے فلسطین کے مختلف شہروں میں اسرائیلی فوج کی انتقامی کارروائیوں، فلسطینی شہروں میں صیہونی آباد کاری اور بستیوں کی تعمیر کی بھی شدید مذمت کی اور صیہونی بستیوں کو امن مساعی کی راہ میں رکاوٹ قرار دیا۔