فلسطین نیوز کو موصول ہونے والی اطلاعات کے مطابق اسرائیلی میزائل اسپائیک کی بھارتی فوج میں شمولیت کی کوششوں کو نئی دہلی میں ایک اہم پیش رفت کے طور پر بھی دیکھا جارہا ہے ۔ہندوستان ٹائمز کی رپورٹ کے مطابق ابتدا میں اسرائیلی کمپنی رافیل نے بھارت سے 8 ہزار اسپائیک اے ٹی جی ایمز فروخت کرنے کا معاہدہ کیا جس میں سے 3 ہزار میزائل بھارت میں ہی تیار کرنے تھے ۔بعد ازاں اس معاہدے کا دوبارہ جائزہ لیا گیا جس کے مطابق صرف 4 ہزار 5 سو میزائل بھارت کو فروخت کیے جائیں گے جبکہ ان کی ایک مختصر تعداد بھارت میں تیار کی جائے گی۔واضح رہے کہ رواں برس جنوری میں اسرائیلی وزیراعظم نیتن یاہو نے نئی دہلی کا دورہ کیا اور اس دوران دونوں ممالک کے درمیان دفاعی شعبے میں اہم معاہدے دیکھنے میں آئے تھے۔
اس موقع پر بھارتی وزیراعظم نریندر مودی کا نیتن یاہو کے بھارتی دورے کے حوالے سے کہنا تھا کہ آپ کا بھارت میں دورہ تاریخی اور خاص ہے ، اس سے دونوں ممالک کی دوستی مزید گہری ہوگی۔یاد رہے کہ گزشتہ برس جولائی میں بھارتی وزیر اعظم مودی نے اسرائیل کا دورہ کیا تھا جس سے وہ تل ا بیب کا دورہ کرنے والے پہلے بھارتی وزیراعظم بن گئے تھے ۔اس دورے کے دوران دونوں ممالک کے درمیان ٹیکنالوجی، صنعت اور دفاع سے متعلق متعدد معاہدے کیے گئے تھے۔