(فلسطین نیوز۔مرکز اطلاعات) چین کی حکومت نے فلسطین کے علاقے غزہ کی پٹی پر اسرائیل کی طرف سے مسلط معاشی پابندیوں اور ناکہ بندی کی سخت الفاظ میں مذمت کرتے ہوئے ناکہ بندی اٹھانے کا مطالبہ کیا ہے۔
فلسطین نیوز کو موصول ہونے والی اطلاعات کے مطابق چینی وزیرخارجہ ’’وانگ یی‘‘ نے بیجنگ میں پریس کو جاری ایک بیان میں کہا کہ ان کا ملک غزہ کی پٹی پر اسرائیل کی مسلط کردہ پابندیوں کو تسلیم نہیں کرتا۔ بیجنگ کا مطالبہ ہے کہ اسرائیل غزہ پرعائد کردہ معاشی پابندیوں کو فوری طورپر ختم کرے۔چینی وزیرخارجہ کا کہنا تھا کہ مسئلہ فلسطین مشرق وسطیٰ کا اہم ترین اور حل طلب مسئلہ ہے۔ چین آزاد اور خود مختار فلسطینی ریاست کے قیام کی حمایت جاری رکھے گا۔
ادھر فلسطین کے سیاسی ، عوامی اور سماجی حلقوں نے چین کی طرف سے غزہ کی پٹی پرعائد پابندیوں کی مذمت کا خیرمقدم کیا ہے۔ فلسطین کی عالمی تعلقات کونسل کے چیئرمین باسم نعیم چینی وزیرخارجہ کے بیان کو خوش آئند قرار دیتے ہوئے کہا ہے کہ ان کے بیان سے فلسطینیوں کے موقف کو تقویت ملی ہے۔
انہوں نے عوامی جمہوریہ چین پر زور دیا کہ وہ فلسطینیوں پر اسرائیلی مظالم بند کرانے کے لیے بھی اپنا کردار ادا کرے اور مسئلہ فلسطین کے منصفانہ حل کے لیے ہونے والی مساعی میں مدد کرے۔