محمود عباس کا صہیونی ریاست کے خلاف تحریک انتفاضہ کچلنے کی سازش کا اعتراف

(فلسطین نیوز۔مرکز اطلاعات) فلسطینی اتھارٹی کے سربراہ محمود عباس نے اعتراف کیا ہے کہ انہوں نے اپنی ماتحت پولیس اور دیگر سیکیورٹی اداروں کو یہ ہدایت جاری کی ہے کہ وہ اسرائیل کے خلاف جاری تحریک انتفاضہ روکنے کے لیے ہرممکن اقدامات کریں۔ صدر عباس کا ماننا ہے کہ ان کے حکم پر عباس ملیشیا کے اہلکار فلسطینی طلباء کے بستوں کی تلاشی لیتے ہیں تاکہ ان کےقبضے سے چاقو یا اس نوعیت کی کوئی دوسری خطرناک شے برآمد کرکے یہودیوں کو حملوں سے بچایا جاسکے۔

اسرائیل کےعبرانی ٹی وی کو دیے گئے ایک انٹرویو میں صدر عباس نے کہا کہ ہم خود بھی فلسطینی نوجوانوں کوصہیونی فوجیوں پر حملوں سے روکنے کی کوشش کررہے ہیں۔ فلسطینیوں کی جانب سے یہودی فوجیوں پر چاقو سے حملے نامعقول ہیں اور فلسطینی اتھارٹی اس طرح کی کارروائیوں کی کسی صورت میں اجازت نہیں دے گی۔ انہوں نے کہا کہ فلسطینی اتھارٹی تشدد پراکسانےکے کسی بھی عمل کی تحسین نہیں کرتی۔ تشدد کا سلسلہ فلسطینیوں کی جانب سے ہو یا اسرائیلیوں کی جانب سے دونوں صورتوں میں قابل مذمت ہے۔

صدر عباس نے بتایا کہ فلسطینی پولیس ان کی ہدایت پر اسکولوں پر چھاپے مارکر طلباء کے بیگوں کی تلاشی لیتی رہی ہے۔ اس دوران ایک ہی اسکول کے طلباء سے 70 چاقو برآمد کیے گئے تھے۔

ایک دوسرے سوال کے جواب میں صدر عباس کا کہنا تھا کہ فلسطینی اتھارٹی کے ناکام ہونے کے خدشات بے بنیاد ہیں۔ تاہم اگر اسرائیل اور فلسطینی اتھارٹی کے درمیان سیکیورٹی تعاون ختم ہوتا ہے تو خطہ خون میں ڈوب جائے گا۔