الخلیل – (فلسطین نیوز۔مرکز اطلاعات) اسرائیل کے عبرانی روزنامے ہارتس نے انکشاف کیا ہے کہ پانچ اسرائیلی فوجیوں کی جانب سے ایک فلسطینی شخص پر بہیمانہ تشدد کی تصاویر منظر عام پر آگئی ہیں۔
فلسطینی شہری کی گرفتاری کے موقع پر لی جانے والی تصویر میں دیکھا جاسکتا ہے کہ اسرائیلی فوج کی نہال بریگیڈ سے تعلق رکھنے والے کم از کم پانچ فوجی فلسطینی کو گھیرے کو گھیرے میں لئے ہوئے ہیں۔ایک فوجی کو تصویر میں فلسیطنی کو ٹھڈے مارتا ہوا دیکھا جاسکتا ہے جبکہ دوسرا فوجی اس فلسطینی کا گلا دبا رہا ہے۔ ایک اور تصویر میں ایک فوجی کو فلسطینی کے اوپر گھٹنا رکھ کر بیٹھا ہوا دیکھا جاسکتا ہے۔ فلسطینی شہری گلی میں ننگے پائوں ہی اسرائیلی جارحیت کا نشانہ بنا ہوا تھا۔
اسرائیلی فوج کا کہنا ہے کہ تصویر میں دیکھا جانے والا فلسطینی شخص حراست پر مزاحمت کررہا تھا مگر اس واقعے کی تحقیقات جاری ہیں۔ فوج کا کہنا تھا کہ علاقے میں حالیہ دنوں کے دوران اسرائیلی فوجیوں پر حملوں کے واقعات میں اضافے کی وجہ سے چھاپا مار مہم جاری ہے۔