غزہ کی صورت حال کے بارے میں اقوام متحدہ کا اظہار تشویش

(فلسطین نیوز۔مرکز اطلاعات) فلسطینیوں کی امداد اور روزگا سے متعلق اقوام متحدہ کے خصوصی ادارے نے غزہ کی صورت حال کے بارے میں سخت تشویش کا اظہار کیا ہے۔

اقوام متحدہ کے ادارے انروا کے سینیئر رکن عدنان ابو حسنہ نے اپنے ایک بیان میں کہا ہے کہ غزہ کے اسّی فی صد لوگ، اپنی روز مرہ کی ضرورتیں پوری کرنے کے لئے عالمی اداروں کی امداد کے محتاج ہیں اور ایسے لوگوں کی تعداد میں مسلسل اضافہ ہو رہا ہے۔ عدنان ابوحسنہ کا کہنا تھا کہ نو لاکھ ساٹھ ہزار فلسطینی پناہ گزیں، منظم طریقے سے انروا سے غذائی امداد حاصل کر رہے ہیں اور ایک سے دو ماہ کے اندر اندر یہ تعداد دس لاکھ تک پہنچ جانے کی توقع ہے۔ اقوام متحدہ کے عہدیدار نے خبردار کیا کہ اسرائیلی محاصرے اور غزہ کی تعمیر نو کا وعدہ کرنے والے ملکوں کے عدم تعاون کے سبب غزہ اب رہنے کے قابل نہیں رہا ہے۔ انہوں نے کہا کہ اگر غزہ کا محاصرہ ختم اور پانی کی آلودگی کا مسئلہ حل نہ ہوا تو سن دو ہزار بیس تک غزہ میں رہنا ناممکن ہو جائے گا۔