(فلسطین نیوز۔مرکز اطلاعات) فلسطین میں اقوام متحدہ کے زیراہتمام ترقیاتی منصوبے کے 10 ویں مرحلے کا افتتاح کیا گیا ہے جس کے تحت غزہ میں غربت اور بے روزگاری کے خاتمے کے لیے 2 ملین یورو کی رقم مختص کی جائے گی اور اسکیم سے غزہ کے ایک ہزار افراد کو روزگارملے گا۔
رپورٹ کے مطابق اقوام متحدہ کے زیراہتمام ترقیاتی ادارے کے عہدیداروں اورفلسطینی حکومت کے درمیان کل منگل کو ایک سمجھوتے پر دستخط کیے گئے جس کے تحت اقوام متحدہ نے غزہ میں دو ملین یورو کی سرمایہ کاری کا اعلان کیا ہے۔ اس پروگرام کا مقصد غزہ کی پٹی میں روزگار کے مواقع پیدا کرنا اور غربت کو کنٹرول کرنے میں فلسطینی قوم کی مدد فراہم کرنا ہے۔غزہ میں منعقدہ تقریب میں اقوام متحدہ کے ترقیاتی پروگرام کے ریجنل ڈائریکٹر باسل ناصر نے بتایا کہ دو ملین یورو کا امدادی پروگرام غزہ اور فلسطین کے دوسرے علاقوں میں ہونے والےترقیاتی پروگراموں کے سلسلے کی کڑی ہے۔اس سے قبل غزہ میں اقوام متحدہ کے 9 ترقیاتی منصوبے مکمل کیے جا چکے ہیں۔
منصوبوں کی تفصیلات کے بارے میں بات کرتے ہوئےانہوں نے کہا کہ اقوام متحدہ کے پروگرام کے تحت غزہ کی پٹی میں انفرا اسٹرکچر کی بہتری کے ساتھ ساتھ شہریوں کو روزگار کے مواقع مہیا کرنا ہے۔
انہوں نے جرمنی اورامداد مہیا کرنے والے دوسرے ممالک کا شکریہ ادا کرتے ہوئے کہا کہ یو این کے امدادی اور ترقیاتی پروگراموں کو جرمنی کی بھرپور مدد حاصل ہے اور وہ غزہ میں سماجی بہبود کے منصوبوں میں شہریوں کی مدد اور معاونت جاری رکھیں گے۔