مرکز اطلاعات فلسطین کے مطابق ترک صدر رجب طیب ایردوآن کے ترجمان ابراہیم کالین نے اپنے ایک بیان میں کہا کہ پیریس میں دہشت گردی کے خلاف امن مارچ میں صہیونی وزیراعظم کی شرکت نہایت افسوسناک اور شرمناک ہے۔ فرانسیسی حکومت کی جانب سے نیتن یاھو کو اس امن ریلی میں شرکت کی دعوت نہیں دی جانی چاہیے تھی۔
انہوں نے کہا کہ صہیونی وزیراعظم خود دہشت گردوں کی نمائندگی کرتے ہیں۔ انہوں نے فرانس میں امن مارچ میں شرکت کے غزہ کی پٹی میں صہیونی ریاستی دہشت گردی سے عالمی توجہ ہٹانے کی کوشش کی ہے۔
مسٹر ابراہیم کالین کا مزید کہنا تھا کہ اسرائیل پیریس میں دہشت گردی کی مذمت کرکے مسئلہ فلسطین سے عالمی توجہ ہٹانے کی کوشش کر رہا ہے۔ نیتن یاھو کی فرانس میں احتاجی ریلی میں شرکت سیاسی مفادات کے حصول کا ایک ذریعہ ہے۔ انہوں نے کہا کہ مغربی دنیا اسلام فوبیا کا شکار ہے۔ یہ بات نہایت افسوسناک ہے کہ اسلام فوبیا میں صہیونی پیش پیش ہیں۔
ترک صدر کے ترجمان نے فرانسیسی جریدے چارلی ایبڈو کی جانب سے گستاخاںہ خاکوں کی اشاعت کی شدید الفاظ میں مذمت کرتے ہوئے اسےاسلام اور مسلمانوں کے خلاف اشتعال انگیز کارروائی قرار دیا ہے۔ انہوں نے کہا کہ نام نہاد آزادی اظہار رائے کی آڑ میں مذاہب اور عقاید کی توہین کی اجازت نہیں دی جا سکتی ہے۔
بشکریہ:مرکزاطلاعات فلسطین