اسرائیلی حکمران جماعت ’’لیکود‘‘ پارٹی کے رکن پارلیمان نے حکومت اور اپنی سکیورٹی فورسز سے مطالبہ کیا ہے کہ غزہ کی پٹی میں موجود حماس کی ساری قیادت کو ختم کردیا جائے۔
عبرانی زبان میں نشر ہونے والے اسرائیلی ریڈیو نے بدھ کے روز صہیونی پارلیمنٹیرین کا ڈینی ڈانون کا یہ بیان نقل کیا۔
ڈینی ڈانون کا کہنا ہے کہ اپنی قوت کو بحال کرنے کے لیے غزہ کی پٹی میں حماس کی قیادت کا خاتمہ ناگزیر ہو گیا ہے۔ ان کے بہ قول اسرائیلی حکومت پر لازم ہوگیا ہے کہ وہ فلسطینی مزاحمت کار تنظیموں بالخصوص حماس کو جلد ختم کردے۔
یاد رہے کہ منگل اور بدھ کی درمیان شب اسرائیلی لڑاکا طیاروں نے غزہ کی پٹی پر خوفناک بمباری کی جس کی زد میں آکر ایک فلسطینی شہید جبکہ درجنوں زخمی ہوگئے تھے۔ اس سے ایک روز قبل بھی صہیونی فوج نے غزہ کی پٹی پر اپنی گولہ باری میں تین مجاہدین کو شہید کیا تھا۔
غزہ کے فلسطینی مزاحمت کاروں نے اسرائیلی حملوں کے جواب میں اسرائیلی علاقوں پر راکٹ حملے کیے جن کی زد میں آکر پانچ صہیونی زخمی ہوئے ہیں۔ صہیونی رکن پارلیمان ڈینی ڈانون نے حماس کے انہیں راکٹ حملوں پر سیخ پا ہوکر حالیہ بیان جاری کیا ہے۔
بشکریہ: مرکز اطلاعات فلسطین