اہالیاں غزہ سے اظہار یکجہتی کے لئے عالمی اور عرب وفود کی غزہ آمد کا سلسلہ جاری ہے۔ گزشتہ روز ترکی سے ایک وفد جنگ زدہ بھائیوں سے اظہار یکجہتی کے لئے غزہ پہنچا۔ وفد اپنے ہمراہ غذائی سامان بھی بطور امداد ساتھ لایا ہے۔ رفح کراسنگ پر خدمات سرانجام دینے والے ایک عہدیدار نے مرکز اطلاعات فلسطین کو بتایا کہ پانچ ترک مہمان غذائی مواد سے بھرے دو کنٹینرز کے ہمراہ رفح سرحد کے راستے غزہ آئے ہیں۔ ترک سالیڈیرٹی فاؤنڈیشن کے سربراہ اونال اوزتورک نے بتایا کہ ان کی تنظیم گزشتہ مہینے اسرائیلی حملے کے بعد سے ہی مقامی تنظیموں کے ذریعے فلسطینی بھائیوں کی امداد کرتی چلی آ رہی ہے۔ اوزتورک کے مطابق ان کی تنظیم نے جنگ سے متاثرہ افراد جن میں بچے بھی شامل ہیں کے لئے امدادی سامان بھیجا ہے۔ نیز نادار فلسطینی خاندانوں کی امداد کے لئے خصوصی پیکج تیار کئے گئے ہیں۔ انہوں نے بتایا کہ ہم غزہ میں جاری منصوبوں کا جائزہ لینے آئیں ہیں تاکہ فلسطینی بھائیوں کی مزید ضروریات کی تکمیل کا سامان بہم پہنچایا جا سکے۔
بشکریہ:مرکزاطلاعات فلسطین
