(فلسطین نیوز۔مرکز اطلاعات) فلسطین کے محصور علاقے غزہ کی پٹی کے لیے امدادی سامان لے کر آنے والے ترکی کے امدادی جہاز’مرمرہ‘ پر 31 مئی سنہ 2010ء کو صہیونی فوج کی ننگی جارحیت کے چھ سال مکمل ہونے پر صہیونی دہشت گردی کی یاد میں احتجاجی مظاہروں کا اہتمام کیا گیا۔
فلسطین نیوز کو موصول ہونے والی اطلاعات کے مطابق ترکی کے شہر استنبول میں ہزاروں افراد نے القدس ریلی نکالی جس میں مظاہرین نے ہاتھوں میں بینرز اور کتبے اٹھا رکھے تھے۔ ان پر القدس کی آزادی تک جدوجہد جاری رکھنے اور فلسطینیوں کی ہرممکن مدد جاری رکھنے کے عزم کا اعادہ کیا گیا تھا۔ مظاہرین نے مرمرہ پر اسرائیلی فوج کی دہشت گردی کی مذمت کی اور ترک حکومتسے مطالبہ کیا کہ وہ مرمرہ حملے پر معافی مانگے بغیر اسرائیل سے سفارتی تعلقات بحال نہ کرے۔خیال رہے کہ اکتیس مئی 2010ء کو عالمی امدادی جہازوں کا ایک قافلہ (فریڈم فلوٹیلا) عالمی سمندری حدود سے ہوتے ہوئے غزہ کی جانب گامزن تھا کہ صہیونی بحریہ نے قافلے میں شامل ترک بحری جہاز مرمرہ پر گن شپ ہیلی کاپٹروں سے حملہ کرنے کے بعد اپنے فوجی کمانڈوز بھی جہاز پراتار دیے، جنہوں نے دہشت گردی کا مظاہرہ کرتے ہوئے 10 ترک رضاکاروں کوشہید اور 50 کو زخمی کر دیا تھا۔