برازیل میں فلسطین کا پہلا سفارت خانہ قائم

(فلسطین نیوز۔مرکز اطلاعات) دارالحکومت برازیلیا میں فلسطینی سفارت خانے کی افتتاحی تقریب میں برازیلی حکام اور مختلف ملکوں کے سفیروں کے علاوہ عرب برادری سے تعلق رکھنے والے لوگوں کی ایک بڑی تعداد شریک تھی۔ فلسطینی اتھارٹی کے خصوصی ایلچی ابراہیم الزبن نے سفارت خانے کی افتتاحی تقریب میں خصوصی طور پر شرکت کی۔ برازیل میں فلسطینی سفارت خانے کا افتتاح ایسے وقت میں ہوا ہے جب ، نئے اسرائیلی سفیر کی تقرری کےمعاملے پر برازیل اور صیہونی حکومت کے درمیان شدید اختلافات پیدا ہوگئے ہیں۔ صیہونی حکومت نے گزشتہ دسمبر میں مغربی کنارے میں صیہونی بستیوں کے تعمیراتی منصوبے کے انچارج ڈینی دایان کو نیاسفیر نامزد کیا تھا تاہم حکومت برازیل نے اسے اپنے یہاں آنے کی اجازت نہیں دی۔ برازیلی حکام کا کہنا ہے کہ دایان کو بطور اسرائیلی سفیر قبول کرنا، مغربی کنارے میں غیر قانونی صیہونی بستیوں کی تعمیر کے لئے جواز فراہم کرنے کا ذریعہ بن سکتا ہے۔ درایں اثنا برازیل کی دوسو سے زائد اہم شخصیات نے انٹرنیٹ پر ایک دستخطی مہم کے ذریعے اسرائیل کے تعلیمی اداروں اور یونیورسٹیوں کے بائیکاٹ کی حمایت کی ہے۔