اسلامی جمہوریہ ایران کے وزیر خارجہ نے کہا کہ اقوام متحدہ کی سلامتی کونسل نے متعدد وجوہات کی بنا پر اقوام متحدہ کے منشور میں درج اپنی ذمےداری پوری نہیں کی اور اس نے صیہونی حکومت کی توسیع پسندانہ پالیسیاں جاری رہنے کی اجازت دی حالانکہ یہ پالیسیاں بین الاقوامی امن و سلامتی کے لئے خطرہ ہیں۔ محمد جواد ظریف کا مزید کہناتھا کہ مسلمانوں کو اپنے اختلافات ختم کر کے فلسطین پر سے قبضے کے مکمل خاتمے کے لئے عملی طور پر اقدامات انجام دینے چاہئیں۔
محمد جواد ظریف نے یہ بات زور دے کر کہی کہ اسلامی جمہوریہ ایران ہمیشہ مسئلہ فلسطین سے متعلق اپنی ذمےداری پوری کرنے پر تاکید کرتا ہے ۔ ایرانی وزیر خارجہ کا کہنا تھا کہ ایران اس بات سے آگاہ ہے کہ حالیہ عشروں کے دوران فلسطینی کاز کی حمایت کرنے کی وجہ سے ہی اس پر دباؤ ڈالا گیا لیکن اس کے باوجود وہ اپنی اس پالیسی کو جاری رکھے گا۔
واضح رہے کہ اسلامی تعاون تنظیم کا پانچواں ہنگامی سربراہی اجلاس انڈونیشیا کے دارالحکومت جکارتہ میں جاری ہے۔