مقبوضہ بیت المقدس (فلسطین نیوز۔مرکز اطلاعات) اقوام متحدہ کے مشرق وسطیٰ کے لیے خصوصی ایلچی نیکولائی ملاڈی نوف نے گذشتہ روز اسرائیلی وزیراعظم بنجمن نیتن یاھو سے ان کے دفتر میں ملاقات کی۔
فلسطین نیوز کو موصول ہونے والی اطلاعات کے مطابق عبرانی میڈیا میں شائع ہونے والی خبر میں بتایا گیاہے کہ وزیراعظم نیتن یاھو اور اقوام متحدہ کے امن مندوب کے درمیان ہونے والی بات چیت میں علاقائی صورت حال، غزہ کی پٹی میں امن وامان کی خراب صورت حال اور مشرق وسطیٰ کے دیگر مسائل پر بات چیت کی گئی۔خیال رہے کہ اقوام متحدہ کے امن مندوب نے امریکی مشیر جارڈ کوشنر اور مشرق وسطیٰ کے لیے امریکی مندوب جیسن گرین بیلٹ کے دورہ مشرق وسطیٰ کے چند روز بعد اسرائیلی وزیراعظم سے ملاقات کی ہے۔ امریکی مندوبین مشرق وسطیٰ کے لیے امریکی امن منصوبے’صدی کی ڈیل‘ کے نفاذ پر علاقائی ممالک سے بات چیت کررہے ہیں۔
ذرائع کا کہنا ہے کہ بنجمن نیتن یاھو اور اقوام متحدہ کے ایلچی کے درمیان ہونے والی بات چیت میں بھی امریکا کے مجوزہ امن منصوبے’صدی کی ڈیل‘ پر تفصیلی بات چیت کی گئی۔
ادھر اسرائیلی وزیر دفاع آوی گیڈور لائبرمین نے کہا ہے کہ قبرص کی ایک بندرگاہ پر غزہ کی پٹی کو سامان کی ترسیل کی تجویز سے اتفاق ہے مگر غزہ کو سامان کی ترسیل کے عمل کی نگرانی اسرائیل خود کرے گا۔