فلسطین کے مقبوضہ شہر اور اسرائیل کے دارالحکومت تل ابیب [تل الربیع] میں ایک مسافر بس میں دھماکہ ہوا ہے جس کے نتیجے میں متعدد افراد معمولی زخمی ہوئے ہیں۔ زخمیوں کو فوری طورپر طبی امداد کے لیے اسپتال منتقل کردیا گیا ہے۔ پولیس نے دھماکے میں استعمال ہونے والے بارود کی جانچ پڑتال کے لیے تحقیقات شروع کردی ہیں۔
اسرائیلی پولیس کا کہنا ہے کہ یہ واقعہ اتوار کو جنوبی تل ابیب میں بیت یام کے مقام پر اس وقت پیش آیا جب مسافر بس اپنے روٹ پر سواریاں لے جا رہی تھی۔
صہیونی پولیس کا کہنا ہے کہ ڈرائیور نے بس میں ایک مشکوک بیگ دیکھا اور فوری طور پر تمام سواریوں کو نیچے اتار دیا گیا۔ اس کے ساتھ پولیس اور بم ڈسپوزل اسکواڈ کو اطلاع دی گئی۔ پولیس نے موقع پر پہنچ کر بیگ کھولا تو وہ دھماکے سے پھٹ گیا، قریب کھڑے چند افراد زخمی ہوئے ہیں۔
خیال رہے کہ اسرائیل کے ہائی سیکیورٹی زون میں یہ واقعہ کئی سال بعد پہلی مرتبہ پیش آیا ہے۔ اسرائیلی میڈیا نے فوری طور پر اس کارروائی کو فلسطینی مزاحمت کاروں کے کھاتے ڈالنا شروع کردیا گیا ہے تاہم ابھی تک کسی تنظیم نے اس دھماکے کی ذمہ داری قبول نہیں کی ہے۔