تہران (فلسطین نیوز۔مرکز اطلاعات) ایران کے اعلی عہدیدار کا کہنا ہے کہ اسرائیل کو فلسطین اور علاقائی امن کو خطرے میں ڈالنے کی اجازت نہیں دی جائے گی۔
فلسطین نیوز کو موصول ہونے والی اطلاعات کے مطابق ایران کی پارلیمنٹ مجلس شورائے اسلامی کے اسپیکر کے معاون خصوصی برائے بین الاقوامی امورحسین امیرعبداللہیان نے ٹویٹ کرتے ہوئے کہا کہ صہیونیوں کی جعلی ریاست آج اپنی سب سے کمزور پوزیشن پر ہے۔ انہوں نے اسرائیل کو ایک ناجائز اور غیر قانونی ریاست قرار دیتے ہوئے کہا کہ بیت المقدس کو اسرائیل کا دارالحکومت بنانے کے لیے امریکی صدر کی حالیہ کوششیں ایک پریشان کن خواب کی طرح ہیں۔حسین امیرعبداللہیان نے کہا کہ اسرائیل ایک غاصب ریاست ہے جو مزاحمتی تحریک کے خوف سے اپن ارد گرد کنکریٹ کی دیواریں کھڑی کرکے اسرائیل کو تحفظ فراہم کرنے کی کوشش کررہا ہے۔ انہوں نے کہا کہ ہر چند داعش نے اسلامی ممالک کی تباہی کے لیے اس ناجائز ریاست کی بڑی حمایت کی لیکن فی الحال تل ابیب اپنی سب سے کمزور پوزیشن میں ہے۔
عبداللہیان کا کہنا تھا کہ آل سعود اور ٹرمپ بھی اسرائیل کی اس بگڑتی ہوئی صورتحال میں اس ناجائز ریاست کو نہیں بچا سکتے۔