نیویارک – (فلسطین نیوز۔مرکز اطلاعات) امریکا کے یہودیوں نے وائٹ ہاؤس کے باہر اجتماع کر کے اقوام متحدہ کی سلامتی کونسل میں اسرائیل مخالف قرارداد کی حمایت کا اعلان کیا ہے۔
فلسطین نیوز کو موصول ہونے والی اطلاعات کے مطابق امریکا کے یہودیوں کی ایک بڑی تعداد نے وائٹ ہاؤس کے باہر اجتماع کرکے مقبوضہ فلسطینی علاقوں میں اسرائیل کے ذریعے غیر قانونی بستیوں کی تعمیر پر فوری طور پر روک لگائے جانے کا مطالبہ کیا- ان امریکی یہودیوں کا کہنا تھا کہ فلسطینیوں کی سرزمینیں فوری طور پر فلسطینیوں کو واپس لوٹائی جائیں۔اقوام متحدہ کی سلامتی کونسل نے گذشتہ جمعے کو اس قرارداد کی منطوری د ی تھی جس میں فلسطینی علاقوں میں صیہونی بستیوں کی تعمیر کو روک دینے کا مطالبہ کیا گیا تھا۔ اس قرارداد کے حق میں سلامتی کونسل کے چودہ ارکان نے ووٹ دیئے جبکہ امریکا نے رائے شماری میں حصہ نہیں لیا تھا۔
اس قرارداد میں صیہونی حکومت سے کہا گیا ہے کہ وہ مقبوضہ فلسطینی علاقوں منجملہ مشرقی بیت المقدس میں صیہونی بستیوں کی تعمیر فوری طور پر بند کر دے- صیہونی حکومت بڑے پیمانے پر صیہونی بستیاں تعمیر کر کے فلسطین میں آبادی کے تناسب کو بگاڑنا اور فلسطینی علاقوں کو صیہونی رنگ دینا چاہتی ہے۔