تہران (فلسطین نیوز۔مرکز اطلاعات) بیداری اسلامی کے سیکرٹری جنرل ڈاکٹر علی اکبر ولایتی نے شہید عماد مغنیہ کی شہادت کی دسویں برسی کے موقع پر خطاب میں ماضی میں فلسطین کے دفاع کی طرف اشارہ کرتے ہوئے کہا ہے کہ اسرائیل کی بدنام زمانہ اور غاصب حکومت کا خاتمہ ہوجائے گا۔
فلسطین نیوز کو موصول ہونے والی اطلاعات کے مطابق ڈاکٹر علی اکبر ولایتی نے کہا امریکہ دنیا کے اس طرف سے آکر ہمارے علاقہ میں عراق، شام، فلسطین ، لبنان ، یمن اور دوسرے ممالک کے مسلمانوں کے لئے مشکلات کھڑی کررہا ہے اور اگر ہم عراقی، فلسطینی ، شامی ، لبنانی مسلمانوں کے دفاع کے سلسلے میں تعاون فراہم کریں تو بعض افراد یہ آواز بلند کرتے اور شور مچاتے ہیں کہ ہمارا ، عراق، شام ، فلسطین اور لبنان کے مسلمانوں سے کیا تعلق ہے۔ ہمیں ان کا ساتھ نہیں دینا چاہیے ۔ڈاکٹر ولایتی نے کہا کہ یہ وہی بات ہے جو امریکہ اور اس کے اتحادی کہتے ہیں اور بعض عناصر ان کی باتیں ملک کے اندر دہراتے ہیں۔ انھوں نے کہا کہ ہمیں خطے میں امریکہ کی مداخلت کو روکنے کے سلسلے میں تلاش و کوشش جاری رکھنی چاہیے ۔
ہمیں فلسطین کے مسلمانوں کو تعاون فراہم کرنا چاہیے ، ہمیں امریکہ کے مقابلے میں علاقہ کے مسلمانوں کا بھر پور تعاون کرنا چاہیے۔ انھوں نے کہا کہ اسلامی ممالک کو امریکہ کی سازشوں کو ناکام بنانے کے لئے باہمی اتحاد کامظاہرہ کرنا چاہیے۔امریکہ کے ساتھ تعاون اسلام اور مسلمانوں کے ساتھ بہت بڑی خیانت ہے۔