مرکزاطلاعات فلسطین کے مطابق برطانیہ میں فلسطین کلب کے زیراہتمام دارالحکومت لندن میں بدھ کو وزیراعظم ہائوس کے سامنے ایک احتجاجی مظاہرہ کیاجائے گا۔ اسی روز اسرائیلی وزیراعظم بنجمن نیتن یاھو اپنے دورہ برطانیہ کے دوران اپنے برطانوی ہم منصب ڈیوڈ کیمرون سے ملاقات کریں گے۔
فلسطین کلب کی جانب سے جاری بیان میں کہا گیاہے کہ لندن میں اسرائیلی وزیراعظم کی آمدکے خلاف احتجاجی مظاہرہ مقامی وقت کے مطابق دن گیارہ بجے کیا جائےگا۔ مظاہرین گیارہ بجے سے ایک بجے تک برطانوی وزیراعظم ہائوس کے باہر دھرنا دیں گے۔ مظاہرین اپنے ہاتھوں میں فلسطینی پرچم لہرائیں گے اور اسرائیلی وزیراعظم کی برطانیہ آمد پرانہیں گرفتار کرنے کا مطالبہ بھی کریں گے۔
اسرائیلی وزیراعظم اپنے برطانیہ کے دورے پرایک ایسے وقت میں پہنچ رہے ہیں جب ان کی گرفتاری کی ایک عوامی پٹیشن پر ایک لاکھ سے زائد افراد نے دستخط کردیے ہیں۔ برطانوی قانون کی رو سے ایک لاکھ افراد کے مطالبے کے بعد کسی بھی دوسرے ملک کی شخصیت کی گرفتاری کا معاملہ پارلیمنٹ میں زیربحث لایا جاسکتا ہے۔ تاہم برطانوی حکومت نے اسرائیلی وزیراعظم کی گرفتاری کے مطالبے کے حوالے سے واضح کیا ہے کہ لندن حکومت نیتن یاھو کو گرفتار نہیں کرے گی کیونکہ انہیں آئینی تحفظ حاصل ہے۔