(فلسطین نیوز۔مرکز اطلاعات) یورپی یونین نے الخلیل کے علاقے میں فلسطینیوں کے گھر منہدم کیے جانے کی مذمت کی ہے۔
فلسطین نیوز کو موصول ہونے والی اطلاعات کے مطابق یورپی یونین کے جاری کردہ بیان میں اسرائیل کے ہاتھوں الخلیل سمیت فلسطینی اتھارٹی کے انتظام والے علاقوں میں فلسطینوں کے رہائشی مکانات کے انہدام کی شدید الفاظ میں مذمت کی گئی ہے۔ اس بیان میں آیا ہے کہ اسرائیل کی جانب سے فلسطینیوں کے گھروں کے انہدام کا افسوسناک سلسلہ رواں سال کے دوران بھی جاری ہے اور اس میں مسلسل اضافہ ہورہا ہے۔ یورپی یونین نے پورے مغربی کنارے میں فلسطینیوں کے گھروں اور خاص طور سے یورپی یونین کے تعاون سے تعمیر ہونے والی عمارتوں کے انہدام کا سلسلہ فوری طور پر بند کرنے کا مطالبہ کیا ہے۔ بیان میں کہا گیا ہے کہ اسرائیلی حکام کو عالمی قوانین اور انسانی ضابطوں کی پاسداری کرتے ہوئے فلسطینوں کے گھروں اور اموال کی توڑ پھوڑ کا سلسلہ بند کردینا چاہیے۔ قابل ذکر ہے کہ درجنوں اسرائیلی فوجیوں نے الخلیل کے علاقے جورہ کا محاصر کرنے کے بعد فلسطینیوں کے گھروں کو مسمار اور پانی کے کنوؤں کو بند کرنا شروع کردیا ہے۔ اسرائیل کے اس اقدام کا مقصد نئی صیہونی بستیوں کی تعمیر کے لیے فلسطینیوں کو ان کے آبائی علاقوں سے کوچ پر مجبور کرنا ہے۔
یورپی یونین کا اسرائیل سے فلسطینیوں کے گھروں کا انہدام بند کرنے کا مطالبہ
