مقبوضہ بیت المقدس (فلسطین نیوز۔مرکز اطلاعات) فلسطین کے مقبوضہ مغربی کنارے میں قائم صیہونی کالونیوں کی آڑ میں غاصبانہ قبضہ مستحکم کرنے کے لیے صیہونی ریاست کئی طرح کے حربےاستعمال کر رہی ہے۔ اس سلسلے میں ایک تازہ حربہ ٹیلی کام کے شعبے میں نام نہاد منصوبے ہیں جن کا آغاز حال ہی میں کیا گیا ہے۔
فلسطین نیوز کو موصول ہونے والی اطلاعات کے مطابق اسرائیل کے عبرانی ٹی وی چینل 7 کی رپورٹ میں بتایا گیا ہے کہ صیہونی ریاست نے غرب اردن میں قائم صیہونی کالونیوں میں موبائل ٹیلی فون اور ڈاک کے شعبے کو منظم کرنے کے لیے 30 ملین شیکل (نو ملین امریکی ڈالر) کا بجٹ مختص کیا ہے۔ مبصرین کا کہنا ہے کہ پوسٹل سروسز اور موبائل فون نیٹ ورک کی سہولیات کی آڑ میں غرب اردن پرقبضہ مستحکم کرنےکی سازش کی جا رہی ہے۔عبرانی ٹی وی چینل کے مطابق اسرائیل کے ٹیلی کام کے شعبے وزیر اور حکمران جماعت ’لیکوڈ‘ کے سینیر رہنما نے غرب اردن میں قائم تمام صیہونی کالونیوں کو پوسٹل سروس کے ذریعے باہم مربوط بنانے کے ایک منصوبے کی منظوری دی ہے۔ اب ان صیہونی کالونیوں میں صیہونی آباد کاروں کو ڈاک کی آمد ورترسیل کے لیے ڈاک خانوں تک جانے کے بجائے یہ سہولت ان کے گھر کی دہلیز پر پہنچائی جائے گی۔
اسی طرح صیہونی حکومت نے غرب اردن کی صیہونی کالونیوں میں نئے موبائل نیٹ ورک کے منصوبے پر کام شروع کرنے کا اعلان کیا ہے۔
اسرائیلی وزیر ٹرانسپورٹ یسرائیل کاٹز کا کہنا ہے کہ وہ غرب اردن کی صیہونی کالونیوں کو ایک دوسرے سے مربط بنانے کے لیے 475 کلو میٹر طویل ریلوے لائن منصوبے پر کام کررہے ہیں۔