فلسطین نیوز کو موصول ہونے والی اطلاعات کے مطابق اسلامی تعاون تنظیم کے جدہ میں قائم صدر دفتر سے جاری ہونے والے ایک بیان میں غزہ کی پٹی پر اسرائیلی فوج کے فضائی اور زمینی حملوں کی شدید مذمت کرتے ہوئے اسے خطرناک جارحیت قرار دیا ہے۔
بیان میں کہا گیا ہے کہ غزہ کی پٹی پر اسرائیلی جنگی طیاروں اور تو پخانے کی تازہ بمباری کے سنگین نتائج برآمد ہو سکتے ہیں جن کی تمام تر ذمہ داری صہیونی ریاست پرعائد ہوتی ہے۔ بیان میں کہا گیا ہے کہ غزہ کی پٹی پر حملہ جنگ بندی اور بین الاقوامی انسانی حقوق کی بھی کھلی خلاف ورزی ہے۔
خیال رہے کہ اتوار کے روز قابض اسرائیلی فوج نے فلسطین کے علاقے غزہ کی پٹی پر 60 سے زائد زمین اور فضائی حملے کیے تھے جس کے نتیجے میں تین بچوں سمیت متعدد فلسطینی شہری زخمی ہو گئے تھے۔ بمباری میں فلسطینی شہریوں کے کئی مکانات کو بھی بری طرح نقصان پہنچا ہے۔