قاہرہ (فلسطین نیوز۔مرکز اطلاعات) عرب لیگ نے مقبوضہ بیت المقدس میں قائم عیسائی عبادت گاہوں اور ان کی املاک پر ٹیکس عائد کرنے کے اسرائیلی فیصلے کی شدید مذمت کرتے ہوئے اسے مذہبی امور میں صیہونی ریاست کی صریح مداخلت قرار دیا ہے۔
فلسطین نیوز کو موصول ہونے والی اطلاعات کے مطابق عرب لیگ نے ایک بیان میں عیسائی دنیا سے مطالبہ کیا ہے کہ بیت المقدس میں صیہونی ریاست کی انتقامی پالیسیوں کے شکار گرجا گھروں کو تحفظ فراہم کرے۔عرب لیگ نے صیہونی ریاست کی طرف سے فلسطین کے گرجا گھروں پر ٹیکس عائد کرنے کو اسرائیل کی کھلی جارحیت قرار دیاÂ اور کہا کہ اسرائیل ٹیکسوں اور دیگر حربوں کے ذریعے فلسطینی مقدس مقامات کو بند اور ان کی املاک ہتھیانے کی سازشیں کررہا ہے۔
عرب لیگ کے سفیر برائے فلسطینی امورسعید ابوعلی نےایک بیان میں کہا کہ اسرائیل فلسطین کے مسلمانوں اور عیسائی دونوں کو برابر انتقامی کارروائیوں کا نشانہ بنا رہا ہے۔ ان کا کہنا تھا کہ صیہونی ریاست کی طرف سے فلسطین میں مسلمانوں کی مساجد اور عیسائیوں کے گھرجا گھر یکساں طور پر متاثر ہو رہے ہیں۔
ابو علی نے گرجا گھروں کی املاک پر ٹیکس لگانے کو عالمی قراردادوں، بین الاقوامی قوانین، معاہدوں مذہبی حقوق کے بنیادی چارٹر کی کھلی خلاف ورزی قرار دیا ہے۔
خیال رہے کہ اسرائیلی حکومت نے القدس اور فلسطین کے دوسرے علاقوں میں موجود گرجا گھروں کی املاک پر نیا ٹیکس عائد کیا ہے جس پر فلسطین سمیت دنیا بھر میں شدید رد عمل سامنے آیا ہے۔