مقبوضہ بیت المقدس (فلسطین نیوز۔مرکز اطلاعات) اسرائیلی ذرائع ابلاغ نے دعویٰ کیا ہے کہ یورپی یونین نہتے فلسطینیوں کے خلاف طاقت کے استعمال میں ملوث صیہونی عہدیداروں کے خلاف قانونی کارروائی میں معاونت کے لیے فنڈز مہیا کررہی ہے۔
فلسطین نیوز کو موصول ہونے والی اطلاعات کے مطابق عبرانی اخبار ’یسرائیل ھیوم‘ نے اپنی رپورٹ میں اسرائیل میں انسانی حقوق کے لیے کام کرنے والے ایک گروپ کے حوالے سے بتایا ہے کہ فلسطینیوں کے خلاف انسانی حقوق کی سنگین پامالیوں میں ملوث فوجی اور حکومتی عہدیداروں کے خلاف عالمی سطح پر قانونی چارہ جوئی کے لیے یورپی یونین انسانی حقوق کارکنوں کوÂ فنڈز مہیا کرتی ہے۔اسرائیل کی ایک غیر سرکاری تنظیم’ آرگنائزیشنز آبزر ویٹری‘ صیہونی فوج کے جرائم کے خلاف قانونی کارروائی میں سرگرم اداروں اور تنظیموں کو یورپی ملکوں سے ملنے والی امداد پر نظر رکھتی ہے۔ اس تنظیم کا کہنا ہے کہ اسرائیل میں انسانی حقوق کے لیے کام کرنے والے کئی گروپوں کو یورپی ممالک سے فنڈز ملتے ہیں اور وہ ان فنڈز کو انسانی حقوق کی خلاف ورزیوں میں ملوث عناصر کے خلاف قانونی چارہ جوئی کے لیے استعمال کرتے ہیں۔
رپورٹ کے مطابق اسرائیلی حکومت فلسطینیوں کے خلاف جرائم میں ملوث فوجیوں کے خلاف سنجیدہ تحقیقات نہیں کرتی اور اسرائیلی عدالتیں فلسطینیوں کے خلاف سنگین جرائم اور انسانی حقوق کی کھلم کھلا پامالیوں میں ملوث ملزمان کو بری کردیتیں ہیں۔
’یسرائیل ھیوم‘ کے مطابق یورپی یونین نے فلسطینیوں کے خلاف جرائم کی تحقیقات اور خلاف ورزیوں میں ملوث اسرائیلی فوجی افسران کے خلاف قانونی چارہ جوئی کے لیے 2 لاکھ 50ہزار یورو مختص کیے ہیں اور یہ رقم اکتوبر 2019ء تک ادا کی جائے گی۔