استنبول – (فلسطین نیوز۔مرکز اطلاعات) بیرون ملک فلسطین کے مختلف شعبہ ہائے زندگی کے افراد کی طرح انجینیر برادری نے بھی مسئلہ فلسطین کے لیے اپنی مساعی کو مجتمع کرنے کے لیے ’فلسطین انجینیرنگ یونین‘ کے قیام کا اعلان کیا ہے۔
فلسطین نیوز کو موصول ہونے والی اطلاعات کے مطابق گذشتہ روز ترکی میں دوسرے ملکوں میں خدمات انجام دینے والے فلسطینی انجینیروں کی بڑی تعداد نے یونین کی تاسیسی کانفرنس میں شرکت کی۔ اس موقع پر ترکی میں موجود فلسطینی شہریوں اور ترک حکومت کے عہدیدار بھی موجود تھے۔ کانفرنس میں شرکت کے والے فلسطینی انجینیر عرب ممالک اور دوسرے ملکوں سے استنبول پہنچے۔ ان کی تعداد سیکڑوں میں بتائی جاتی ہے۔انجینیریونین کی تاسیسی کانفرنس کی میزبان کمیٹی کے چیئرمین ابراہیم ابو ثریا نے کہا کہ دوسرے ملکوں میں مقامی سطح پر انجینیر برادری کی طرف سے خود کو منظم کرنے کی کوششیں کی گئی ہیں مگر ہم وسیع ترسطح پر انجینیر برادری کو منظم کرتے ہوئے فلسطینی قوم کی خدمت کے لیے اپنی منتشر مساعی کو یکجا کرنا چاہتے ہیں۔ انہوں نے کہا کہ اس وقت دوسرے ملکوں میں بڑی تعداد میں فلسطینی انجینیر خدمات انجام دے رہے ہیں مگر انہیں قوم اور مسئلہ فلسطین کی خدمت کے لیے منظم کرنے کا جامع پروگرام تیار نہیں کیا جا سکا ہے۔ ان کی مساعی کا مقصد بیرون ملک خدمات انجام دینے والی انجینیر برادری کو قومی کاز کے لیے منظم کرنا ہے۔
انہوں نے کہا کہ انٹرنیشنل فلسطینی انجینیرنگ سوسائٹی ایک غیر منافع بخش فلسطینی تنظیم ہے جو دوسرے ملکوں میں خدمات انجامدینے والے انجینیروں کی فلاح بہبود اور ان کے حقوق کے لیے کام کرتی ہے۔ نئی قائم ہونے والی انجینیرنگ یونین کا صدر دفتر ترکی میں قائم کیا جائے گا جب کہ دوسرے ملکوں میں اس کی مقامی شاخیں قائم کی جائیں گی۔