(فلسطین نیوز۔مرکز اطلاعات) فلسطین کے علاقے غزہ کی پٹی میں اسرائیل کی مسلط کردہ جنگ کے نتیجے میں جزوی طورپر متاثر ہونے والے مکانات کے مالکان کو اقوام متحدہ اور دیگر اداروں کی جانب سے مجموعی طورپر 33 ملین ڈالر کی امدادی رقم ادا کرنے کا فیصلہ کیا گیا ہے۔
رپورٹ کے مطابق غزہ کی پٹی میں فلسطینی وزیر برائے آباد کاری مفید الحساینہ نے بتایا کہ حکومت اور اقوام متحدہ کے ترقیاتی ادارے UNDP کے درمیان ایک مفاہتمی یاداشت پر دستخط کیے گئے ہیں جس کے تحت غزہ کی پٹی میں سنہ 2014 ء کے وسط میں اسرائیل کی جانب سے مسلط کردہ جنگ سے جزوی طور پرمتاثر ہونے والے 20 مکانات کی بحالی اور مرمت کے لیے ان کے مالکان کو 33 ملین ڈالر کی رقم ادا کی جائے گی۔ انہوں نے مزید کہا کہ اس امدادی فنڈ میں غزہ میں تین اسکولوں کا قیام بھی شامل ہے۔غزہ میں ایک نیوز کانفرنس سے خطاب کرتے ہوئے مفید الحساینہ کا کہنا تھا کہ اقوام متحدہ کے تعاون سے جنگ سے جزوی متاثرہ مکانات کےمالکان کو آئندہ چند روزکے اندر اندر فنڈز جاری کردیے جائیں گے۔
وزیرآباد کاری کا کہنا تھا کہ غزہ کی پٹی کے لیے یہ فنڈز وزیراعظم رامی الحمد اللہ کی محنت کا نتیجہ ہے۔ انہوں نے عرب اور یورپی ممالک سے رابطوں کے ذریعے یہ امدادی رقم حاصل کی ہے، جنہیں اقوام متحدہ کی نگرانی میں صرف کیا جائے گا۔