(فلسطین نیوز۔مرکز اطلاعات) سعودی عرب کی جانب سے فلسطین کے علاقے غزہ کی پٹی میں دو سال قبل اسرائیل کی مسلط کردہ جنگ کے نتیجے میں تباہ ہونے والے مکانات کی تعمیر نوکے لیے 31.8 ملین ڈالر کی امداد کا اعلان کیا گیا ہے۔ یہ امداد اقوام متحدہ کے ترقیاتی ادارے’یو این ڈی پی‘ کے ذریعے خرچ کی جائے گی۔
رپورٹ کے مطابق غزہ کی پٹی میں فلسطینی پناہ گزینوں کی بہبود کے لیے اقوام متحدہ کی ریلیف اینڈ ورکس ایجنسی’’اونروا‘‘ کی جانب سے جاری کردہ ایک بیان میں کہا گیا ہے کہ حال ہی میں ’’اونروا‘‘ اور اقوام متحدہ کے امدادی ادارے ’یو این ڈی پی‘ کے درمیان ایک یاداشت پر دستخط کیے گئے ہیں۔ مفاہمتی یاداشت میں کہا گیا ہے کہ اونروا اور یو این کا ترقیاتی ادارہ مل کر سعودی عرب کی جانب سے فراہم کردہ اکتیس اعشاریہ آٹھ ملین ڈال کی امداد سے غزہ میں جنگ سے تباہ ہونے والے مکانات کی دوبارہ تعمیر کریں گے۔
بیان میں مزید کہا گیا ہے کہ سعودی عرب کی جانب سے فراہم کردہ امداد سے غزہ کی پٹی میں جنگ سے تباہ ہونے والے 5 ہزار مکانات کی تعمیر میں مدد ملے گی۔ اس کے علاوہ سعودی امداد سے غزہ میں تین اسکول بھی تعمیر کیے جائیں گے۔