دمشق: بم دھماکوں میں 31 فلسطینی پناہ گزین شہید

(فلسطین نیوز۔مرکز اطلاعات) اقوام متحدہ کی فلسطینی پناہ گزینوں کے لیے قائم کردہ ریلیف اینڈ ورکس ایجنسی ’’اونروا‘‘ نے ایک رپورٹ میں بتایا ہے کہ شام کے دارالحکومت دمشق میں السیدہ زینب کے مزار پرحال ہی میں ہونے والے تین سلسلہ وار خود کش بم دھماکوں میں کم سے کم 31 فلسطینی پناہ گزین بھی شہید ہوئے ہیں۔ اکیس فروری کو سیدہ زینب کے مزار پرہونے والے دھماکوں میں مجموعی طورپر 120 سے زائد افراد جاں بحق ہوئے تھے۔ شدت پسند تنظیم دولت اسلامی ’’داعش‘‘ نے حملوں کی ذمہ داری قبول کی تھی۔

رپورٹ کے مطابق ’اونروا‘ کی جانب سے جاری کردہ ایک بیان میں کہا گیاہے کہ شام کے دارالحکومت دمشق میں سیدہ زینب کالونی میں ہونے والے بم دھماکوں میں 31 فلسطینی پناہ گزین شہید اور 28 زخمی ہوئے ہیں۔

یو این ریلیف ایجنسی نے اپنی رپورٹ میں کہا ہے کہ دمشق بم دھماکوں میں مارے جانے والے فلسطینی پناہ گزینوں کی حتمی تعداد معلوم نہیں ہوسکی تاہم اب تک اکتیس فلسطینیوں کے جاں بحق ہونے اور اٹھائیس کے زخمی ہونے کی تصدیق کی جا چکی ہے۔ ان دھماکوں میں 120 افراد کے مارے جانے کی تصدیق ہوئی تھی جب کہ درجنوں ابھی تک لا پتا ہے۔

خیال رہے کہ اکیس فروری اتوار کے روز سیدہ زینب کالونی میں ہونے والے تین سلسلہ اور دھماکوں میں چھ ماہ کے ایک شیرخوار سمیت تیس فلسطینی پناہ گزین شہید اور اٹھائیس زخمی ہوگئے تھے جن میں 13 بچے بھی شامل ہیں۔ زخمیوں میں سے بعض کی حالت تشویشناک بیان کی جاتی ہے۔