(فلسطین نیوز۔مرکز اطلاعات) اسلامی مزاحمتی تحریک حماس نے غزہ کے بین الاقوامی ہوائی اڈے اور بندرگاہ کو کھولے جانے کی ضرورت پر زور دیا ہے۔
فلسطین نیوز کو موصول ہونے والی اطلاعات کے مطابق حماس کے نائب سربراہ اسماعیل ہنیہ نے اپنے ایک بیان میں کہا ہے کہ فلسطین کے عوام غزہ کی بندر گاہ اور بین الاقوامی ہوائی اڈہ کھولے جانے کے خواہاں ہے۔ انہوں نے کہا کہ زمینی راستے کے ساتھ ساتھ بیرونی دنیا سے رابطے کے لیے فضائی اور سمندری راستہ بحال کیے جانے کی ضرورت ہے۔حماس کے نائب سربراہ نے فلسطینیوں کے حقوق کی بازیابی پر زور دیتے ہوئے کہا کہ غزہ کی بندرگاہ اور ہوائی اڈے کی بحالی، اسرائیلی محاصرے کے خاتمے کا سبب بنے گی۔
اسماعیل ہنیہ نے یہ بات زور دے کر کہی کہ صیہونی حکومت غزہ کا محاصرہ اور جنگ مسلط کر کے بھی، تحریک مزاحمت کو ختم اور فلسطینیوں کو گھٹنے ٹیکنے پر مجبور نہیں کر سکی۔
انہوں نے ایک بار پھر آزاد فلسطینی ریاست کے قیام پر زور دیتے ہوئے کہا کہ بیت المقدس فلسطین کا دارالحکومت تھا اور آئندہ بھی رہے گا۔
قابل ذکر ہے کہ اسرائیل نے سنہ دو ہزار سات سے غزہ کا محاصرہ کر کے ہر قسم کی اشیا کی ترسیل پر پابندی لگا رکھی ہے۔