فلسطین نیوز کو موصول ہونے والی اطلاعات کے مطابق حماس کی ویب سائیٹ پر پوسٹ ایک خبرمیں بتایا گیا ہے کہ بدھ کو حماس رہنما ڈاکٹر موسیٰ ابو مرزوق نے مصر میں متعین روسی سفیر سے ملاقات کی۔
رپورٹ کے مطابق حماس رہنما ڈاکٹر موسیٰ ابو مرزوق اور روسی سفیر سیرگی کیربیٹچ شنکو کےدرمیان ہونے والی بات چیت میں فلسطین کی تازہ ترین صورت حال، فلسطینیوں کے درمیان مفاہمت کے لیے جاری کوششیں اور ان کی راہ میں حائل رکاوٹوں، حماس کے دورہ مصر اور اس کے مقاصد اور مصر کی طرف سے رفح گذرگاہ کے کھولنے کی یقین دہانی جیسے امور پر بات چیت کی گئی۔
دونوں رہنماؤں نے خطے کی موجودہ صورت حال بالخصوص مسئلہ فلسطین کے حوالے سے امریکا کی پالیسی اور اسرائیل کی کھلی طرف داری پر بھی تبادلہ خیال کیا گیا۔
اس موقع پر روسی سفیر نے حماس کی قیادت کو دورہ روس کی دعوت بھی دی اور کہا کہ ان کا ملک قضیہ فلسطین کے منصفانہ حل اور فلسطینیوں کے درمیان وحدت کے لیے ہونے والی کوششوں کی حمایت جاری رکھے گا۔