غزہ (فلسطین نیوز۔مرکز اطلاعات) اسلامی جمہوریہ ایران کی مجلس شوریٰ (پارلیمنٹ) کے اسپیکر علی لاریجانی نے اسلامی تحریک مزاحمت (حماس) کے سیاسی شعبے کے سربراہ اسماعیل ھنیہ کو ٹیلیفون کیا اور انہیں ماہ صیام کی مبارک باد دینے کے ساتھ فلسطین کی تازہ صورت حال پر بات چیت کی۔
فلسطین نیوز کو موصول ہونے والی اطلاعات کے مطابق علی لاریجانی نے اسماعیل ھنیہ سے بات کرتے ہوئے فلسطینیوں میں پائے جانے والے اختلافات اور عالم اسلام میں جاری رنجشیں دور کرنے کی ضرورت پر زور دیا۔ انہوں نے کہا کہ رمضان المبارک کا مہینہ مسلمانوں کو ایک دوسرے کے ساتھ یکجہتی کا درس دیتا ہے۔انہوں نے کہا کہ مجھے پورا یقین ہے کہ اگر مسلمان ممالک اپنی صفوں میں اتحاد پیدا کریں اور مشترکہ دشمن کو پہچانیں تو پورا عالم اسلام امن کا گہوارہ بن سکتا ہے۔
اسماعیل ھنیہ سے بات کرتے ہوئے ایرانی اسپیکر کا کہنا تھا کہ ایران فلسطینی قوم کے دیرینہ حقوق اور مطالبات کی حمایت جاری رکھے گی۔ انہوں نے فلسطینیوں پر اسرائیلی فوج کی ریاستی دہشت گردی اور امریکی سفارت خانے کی تل ابیب سے القدس منتقلی کی شدید مخالفت کی۔
اسماعیل ھنیہ نے علی لاریجانی سے گفتگو کرتے ہوئے انہیں فلسطین کی تازہ صورت حال سے آگاہ کیا اور ایران کی طرف سے فلسطینی قوم کی حمایت اور مدد پر تہران کا شکریہ ادا کیا۔