اسلامی تحریک مزاحمت "حماس” کے سیاسی شعبے کے رکن عزت الرشق نے کہا ہے کہ ان کی جماعت نے فلسطینی صدر محمود عباس کی جانب سے تیار کردہ اس دستاویز پر دستخط کر دیے ہیں جسے عالمی عدالت انصاف میں فلسطین کی رکنیت اور اسرائیل کے جنگی جرائم کی تحقیقات کے لیے "آئی سی سی” میں جمع کرایا جائے گا۔
مرکز اطلاعات فلسطین کے مطابق عزت الرشق نے بتایا کہ حماس کےسیاسی شعبے کے نائب صدر ڈاکٹر موسیٰ ابو مرزوق نے صدر محمود عباس کی تیار کردہ دستاویز پر دستخط کیے۔ جلد ہی اسے روم میں موجود عالمی عدالت انصاف میں فلسطین کی رکنیت کے حصول کے لیے جمع کرایا جائے گا۔
قبل ازیں حماس رہ نما موسیٰ ابو مرزوق نے بھی سماجی رابطے کی ویب سائیٹ "فیس بک” کے اپنے خصوصی صفحے میں عالمی عدالت انصاف سے رجوع کی مساعی کا تذکرہ کیا تھا۔ ان کا کہنا تھا کہ فلسطینی اتھارٹی کے سربراہ نے فلسطین کی تمام نمائندہ سیاسی قوتوں سے کہا ہے کہ وہ آئی سی سی کی رکنیت کے حصول کے لیے تیار کردہ یاداشت پر دستخط کریں تاکہ جلد از جلد عالمی فوج داری عدالت سے رجوع کیا جا سکے۔