(روزنامہ قدس ۔آن لائن خبر رساں ادارہ) حماس نے کہا کہ ابو ھواش بھر پور خراج تحسین اور مبارک باد کے مستحق ہیں اور فلسطینی قوم کوان جیسے بہادر سپوتوں پر فخر ہے جو خالی پیٹ دشمن کے خلاف آزادی کی جنگ لڑتے ہیں اورقابض دشمن کی جارحیت خلاف ہر محاذ میں کامیاب ہوتے ہیں۔
تفصیلات کے مطابق گذذشتہ روز مقبوضہ فلسطین میں صہیونی ریاستی دہشت گردی کے خلاف برسر پیکار اسلامی تحریک مزاحمت حماس کی جانب سے 141 روز تک صہیونی جیل میں اپنی بلاجواز گرفتاری کے خلاف احتجاجی بھوک ہڑتال کر کے موت و حیات کی جنگ جیتنے والے فلسطینی قیدی ھشام ابو ھواش کو رہائی کے معاہدے پر مبارک باد پیش کی۔
فلسطینی اسیر کی بہادری اور استقامت کی تعریف کرتے ہوئے تحریک حماس نے کہا کہ جماعت ابو ھواش کو قوم کا ایک ہیرو سمجھتی ہےجس نے صہیونی دشمن کے غرور اور طاقت کے گھمنڈ کو خاک میں ملادیا اور قابض حکام نے بہادر فلسطینی مجاھد کی طویل، تکلیف دہ اور صبر آزما بھوک ہڑتال کے بعد رہائی کے لیے گھٹنے ٹیک دیے۔
دوسری جانب ابو ھواش کی بھوک ہڑتال کے خاتمے اور عنقریب صہیونی جیل سے ہائی کی خوشی میں انوکھے انداز میں فلسطینی فنکارکی جانب سے اظہار مسرت کرتے ہوئے دیوار فاصل پرابو ھواش کا تصویری خاکہ بنایا گیا جس کو لوگ دور دور سے دیکھنے آرہے ہیں۔
خیال رہے کہ صہیونی زندانوں میں اسلامی جہاد سے تعلق رکھنے والے ھشام ابو ھواش کی رہائی کیلیے صہیونی حکام اور قیدی کے مابین طے پانے والے معاہدے کے تحت ابو ھواش 26 فروری 2022ء تک مکمل طور پر آزاد ہو جائیں گے۔