فلسطین نیوز کو موصول ہونے والی اطلاعات کے مطابق اسماعیل ھنیہ نے ان خیالات کا اظہار شہید محمد فقیہ کے والدین کو ٹیلیفون پر تعزیت کے دوران کیا۔ انہوں نے کہا کہ شہید فقیہ نے صہیونی غاصبوں کو یہ پیغام دیا ہے کہ فلسطینی قوم اپنی جانیں تو دے سکتی ہے ہے مگرآزادی اور مقدسات کے دفاع کے اپنے مطالبے سے دستبردارنہیں ہوسکتی۔
خیال رہے کہ گذشتہ روز اسرائیلی فوج اور فلسطینی نوجوان مزاحمت کار محمد فقیہ کے درمیان کئی گھنٹے تک جھڑپوں کا سلسلہ جاری رہا۔ سات گھنٹے کے طویل آپریشن کے بعد صہیونی فوجی محمد الفقیہ کو شہید کرنے میں کامیاب ہوگئے تھے۔ محمد الفقیہ پرالزام عاید کیا گیا تھا کہ اس نے رواں ماہ کے اوائل میں الخلیل شہر میں ایک سرکردہ یہودی انتہا پسند مذہبی لیڈر کو گولیاں مار کر قتل کردیا تھا۔
صہیونی فوج یہودی ربی کے قتل کے بعد 29 سالہ محمد الفقیہ کے تعاقب میں تھی۔ کل صبح قابض فوج نے غرب اردن کے جنوبی شہر الخلیل میں صوریف کے مقام پر ایک مکان کا محاصرہ کرنے کے بعد اسے دھماکے سے اڑا دیا تھا جس کے نتیجے میں مکان میں موجود فقیہ جام شہادت نوش کرگیا تھا۔
حماس کے سیاسی شعبے کے نائب صدر اسماعیل ھنیہ نے شہید کی لازوال قربانی پراسے شاندار خراج عقیدت پیش کیا ہے اور کہا ہے کہ فلسطینی قوم شہید فقیہ کے نقش قدم پر چلتے ہوئے دشمن کے خلاف مسلح مزاحمت جاری رکھے گی۔ انہوں نے کہا کہ وہ وقت اب زیادہ دور نہیں جب شہید فقیہ اور دیگر ہزاروں فلسطینی شہداء کا پاکیزہ خون رنگ لائے گا اور فلسطینی قوم آزادی کی فضاء میں سانس لے گی۔ انہوں نے فلسطینی مجاھدین اور پوری قوم پر زور دیا کہ وہ صہیونی ریاستی دہشت گردی کے خلاف مسلح مزاحمت کی پالیسی پر قائم رہیں۔