(فلسطین نیوز۔مرکز اطلاعات) تحریک حماس نے صیہونی حکومت کی جیلوں میں قید و بند کی صعوبتیں برداشت کرنے والے فلسطینی قیدیوں کے سلسلے میں اقوام متحدہ کی جنرل اسمبلی کا ہنگامی اجلاس بلانے کا مطالبہ کیا ہے۔
رپورٹ کے مطابق فلسطین کی اسلامی مزاحمتی تحریک حماس کے سیاسی شعبے کے نائب سربراہ اسماعیل ہنیہ نے غزہ کی نماز جمعہ کے خطبوں میں صیہونی حکومت کی جیلوں میں قید و بند کی صعوبتیں برداشت کرنے والے فلسطینی قیدیوں کے مسائل کی جانب اشارہ کرتے ہوئے کہا کہ سیکڑوں فلسطینی قیدی ، غاصب اسرائیلی حکومت کی پالیسیوں پر احتجاج میں بھوک ہڑتال کئے ہوئے ہیں۔فلسطینی قیدیوں کے کلب کے مطابق جیلوں میں قیدیوں کے ساتھ صیہونیوں کی بدسلوکی کے خلاف تقریبا چار سو فلسطینی قیدی بھوک ہڑتال پر ہیں- اس وقت سات ہزار سے زیادہ فلسطینی قیدی جن میں عورتیں اور بچے بھی شامل ہیں ، اسرائیلی جیلوں میں نہایت خراب حالت میں قید و بند کی صعوبتیں برداشت کر رہے ہیں۔