فلسطینی شہری قبلہ اوّل سے اپنا تعلق مضبوط بنائیں: صالح العاروری

غزہ (فلسطین نیوز۔مرکز اطلاعات) حماس کے سیاسی شعبے کے نائب صدر صالح العاروری نے کہا ہے کہ اتوار کے روز سیکڑوں صیہونی آباد کاروں کا قبلہ اول پر دھاوا اور مقدس مقام کی بے حرمتی حال میں اسرائیل کو یہودیوں کا قومی وطن قرار دینے کے ظالمانہ قانون کا نیتجہ ہے۔

فلسطین نیوز کو موصول ہونے والی اطلاعات کے مطابق ایک بیان میں حماس رہنما نے کہا کہ اسرائیلی کنیسٹ نے صیہونی ریاست کو دنیا بھر کے یہودیوں کا قومی ملک قرار دیا اور اب صیہونی حکومت اس قانون کو نافذ کرنے کے لیے میدان میں اتر آئی ہے۔ قبلہ اوّل پر صیہونی آباد کاروں کے دھاوے اور مقدس مقام کی حرمتی کا تازہ اشتعال انگیز واقعہ یہودی قومیت کے قانون کو آگے بڑھانے کا حصہ ہے۔

انہوں نے مسجد اقصیٰ میں موجود فلسطینی خواتین اور نوجوانوں کی جانب سے صیہونی شرپسندوں کو روکنے کی کوششوں کو سراہا  اور کہا کہ صیہونی آباد کاروں کی مذہبی دہشت گردی کی روک تھام کے لیے غرب اردن اور القدس سمیت ملک کے تمام حصوں سے شہریوں کو قبلہ اوّل میں پہنچنا ہوگا۔

خیال رہے کہ گذشتہ روز اسرائیل کی انتہا پسند جماعتوں کی اپیل پر سیکڑوں صیہونی آباد کاروں نے مسجد اقصیٰ پر دھاوا بولا اور مقدس مقام کی بے حرمتی کا ارتکاب کیا۔