مرکز اطلاعات فلسطین کے مطابق قطر کے صدر مقام دوحہ میں ایک نیوز کانفرنس سے خطاب کرتے ہوئے خالد مشعل کا کہنا تھا کہ غزہ کی جنگ نے اسرائیلی خوف کی پالیسی کو بری طرح ناکام ثابت کیا ہے۔ اس جنگ نے صہیونی فوج پر وہ کاری ضرب لگائی ہے جس کا احساس اب اسے سالوں رہے گا۔ فلسطینی تحریک مزاحمت نے دشمن کے خلاف رعب اور خوف کا توازن برقرار رکھا اور یہ ثابت کیا ہے کہ فلسطینی صہیونی فوج کے لیے ترنوالہ ثابت نہیں ہوسکتے ہیں۔
ایک سوال کے جواب میں حماس رہ نما نے کہا کہ صہیونی لیڈرشپ اس وقت جعلی فتح کی تلاش میں ہے لیکن حقیقی معنوں میں یہ جنگ فلسطینیوں کی فتح کی سب سے بڑی دلیل ہے۔”کھایا ہوا چارا” کے نام سے صہیونی دشمن کے خلاف فلسطینیوں کا معرکہ آزادی کے لیے اہم ترین سنگ میل ثابت ہوگا۔
انہوں نے کہا کہ اس وقت قومی سطح پر اور پورے عالم اسلام میں فلسطینیوں کی صہیونی قہر کے سامنے جرات و بہادری کا مظاہرہ کرنے اور پوری ہمت کے ساتھ دشمن کا مقابلہ کرنے پر داد تحسین مل رہی ہے۔ فلسطینی مجاھدین حقیقی معنوں میں وطن کی آزادی کی فوج ثابت ہوئے ہیں۔
خالد مشعل کا کہنا تھا کہ غزہ جنگ نے ہمیں زیادہ محفوظ بنایا اور اپنی منزل کے اور قریب کردیا ہے۔ اب وقت وہ دور نہیں جب بیت المقدس، مسجد اقصیٰ اور فلسطین میں موجود تمام مقدسات صہیونیوں کے ظالمانہ چنگل سےآزاد ہوں گے۔
ایک دوسرے سوال کے جواب میں حماس کے سیاسی شعبے کے سربراہ نے کہا کہ ہم اسرائیل کو ہلکا نہیں سمجھتے۔ ہمیں معلوم ہے کہ کئی عالمی ٹھیکیدار صہیونی ریاست کی پشت پر کھڑے ہیں۔ وہ اسے عسکری شعبے میں امداد فراہم کرتے ہیں لیکن ہمارے ارادے اور مقاصد قلیل نہیں ہیں۔ کیونکہ جو تھوڑے پر راضی ہوا وہ تھوڑے بھی رہتا ہے۔
ایک سوال پر انہوں نے کہا کہ فلسطینی مجاھدین نے دشمن کو ہر میدان میں شکست فاش سے دوچار کیا ہے۔ مجاھدین کی یہ بڑی کامیابی کہ انہوں نے جنگ کے تمام ایام میں اسرائیل میں بھی نظام زندگی مفلوج کرکے چھوڑا تھا۔ اسرائیلی فوج مسلسل فلسطینی مزاحمت کاروں کے ٹھکانوں اور اہم فلسطینی کمانڈروں کی تلاش کے لیے ایڑی چوٹی کا زور لگا رہی تھی تاکہ بمباری کے ذریعے انہیں نشانہ بنایا جاسکے لیکن دشمن کی انٹیلی جنشیا کو بھی اس میدان میں شرمناک حد تک ناکامی ہوئی ہے۔
جنگ کے نتیجے میں فلسطینی قوم کو مسلح مزاحمت کی کامیابی کا یقین اور دشمن کو فلسطینیوں کی ہمت اور جرات کا اندازہ ہوا۔ اس وقت پوری دنیا کے یہودیوں کے لیے اسرائیلی ریاست ایک بوجھ بن کر رہ گئی ہے۔ خود اسرائیلی اپنے آپ کو مظلوم ثابت کرنے کی بھی عالمی سطح پر ناکام کوشش کررہے ہیں لیکن انسانی حقوق کا احترام کرنے والے ادارے اور عالمی قوتیں جانتیں ہیں کہ مظلوم اسرائیل ہے یا فلسطینی ہیں۔