مرکز اطلاعات فلسطین کے مطابق حماس کے سیاسی شعبے کے نایب صدر ڈاکٹر موسیٰ ابو مرزوق نے اپنے ایک بیان میں عالمی ادارے کے غزہ میں قائم دفاتر پر حملے کسی صورت میں بھی قابل قبول نہیں ہیں۔
انہوں نے کہا کہ ہم سب کو اقوام متحدہ سے گلے شکوے ہیں مگر ہم عالمی ادارے کے دفاترکو نشانہ بنانے اور املاک کی توڑپھوڑ کی حمایت نہیں کرتے ہیں۔
خیال رہے کہ بدھ کے روز اقوام متحدہ اور اس کے ذیلی اداروں کے دفاتر پر مشتعل ھجوم نے حملہ کر کے اس کی توڑپھوڑ کی تھی۔ اقوام متحدہ کے اداروں کے مراکز کو نشانہ بنانے والے مظاہرین کا کہنا تھا کہ عالمی ادارے کی جانب سے غزہ کی پٹی میں امدادی کام روک دیے گئے ہیں، جس کے نتیجے میں بڑی تعداد میں شہریوں کو مشکلات کا سامنا کرنا پڑا ہے۔
یہاں یہ امر بھی واضح رہے کہ چند روز پیشتر اقوام متحدہ کی ریلیف ایجنسی "اونروا” کی جانب سے جاری ایک بیان میں کہا گیا تھا کہ عالمی برادری کی جانب سے امداد کے وعدے پورے نہیں کیے گئے ہیں جس کے نتیجے میں وہ امدادی کام مزید جاری نہیں رکھ سکتے ہیں۔ اونروا کے اس بیان کے رد عمل میں سیکڑوں فلسطینیوں نے عالمی ادارے کے دفاتر کے باہر ٹائر جلا کر احتجاج کیا اور دفتر پر حملہ کر کے اس کی توڑپھوڑ کی تھی۔
اس واقعے کے رد عمل میں حماس رہ نما نے کہا کہ فلسطینی عوام کو احتجاج کا حق ہے مگر شہریوں کے لیے کسی طور پر یہ مناسب نہیں کہ وہ احتجاج کو پرتشدد رنگ دینے کے بعد عالمی ادارے کے مراکز پرحملے کریں۔
بشکریہ:مرکزاطلاعات فلسطین