غزہ (فلسطین نیوز۔مرکز اطلاعات) اسلامی تحریک مزاحمت (حماس) نے انسانی حقوق کی عالمی تنظیم ’ہیومن رائٹس واچ‘ کی طرف سے فلسطینیوں کے خلاف اسرائیلی جرائم کی تحقیقات پر مبنی رپورٹ جاری کرنے اور تشدد میں ملوث اسرائیلی فوجیوں کے خلاف قانونی کارروائی کا مطالبہ کرنے کا خیرمقدم کیا ہے۔
فلسطین نیوز کو موصول ہونے والی اطلاعات کے مطابق حماس کی طرف سے جاری کردہ ایک بیان میں کہا گیا ہے کہ عالمی ادارے ’ایچ آرڈبلیو‘ کی رپورٹ میں واضح طورپر نہتے فلسطینیوں کے قتل عام میں اسرائیلی ریاست کو قصور وار اور ذمہ دار ٹھہرایا گیا ہے۔ غزہ کی پٹی میں بے گناہ فلسطینیوں کے قتل عام میں اسرائیل کے ملوث ہونے کی تحقیقات اور معصوم فلسطینیوں کو تحفظ فراہم کرنے کے مطالبے پر رپورٹ خوش آئند اقدام اور صیہونی جرائم کا ایک دستاویزی ثبوت ہے۔حماس کا کہنا ہے کہ ہیومن رائٹس واچ نے اسرائیلی ریاست کو فلسطینیوں کے خلاف جرائم میں ملوث ہونے کا ثبوت فراہم کرکے صیہونی دشمن کے ان تمام نام نہاد دعوؤں اور حربوں کو مسترد کردیا ہے جن کی آڑ میں صیہونی ریاست غزہ کی پٹی اور فلسطین کے دوسرے علاقوں میں بے گناہ فلسطینیوں کے قتل عام میں ملوث ہے۔
خیال رہے کہ غزہ کی پٹی پر 30 مارچ 2018ء کے بعد سے اسرائیل کی طرف سے مسلط کردہ جارحیت کے نتیجے میں 130Â فلسطینی شہری شہید اور ہزاروں کی تعداد میں زخمی ہوچکے ہیں۔