سوڈان پر اسرائیلی حملہ، امت مسلمہ اٹھ کھڑی ہو: حماس

اسلامی تحریک مزاحمت ۔ حماس کے ترجمان علی برکہ نے ایک وفد کے ہمراہ لبنان کے دارالحکومت بیروت میں سوڈانی سفارت خانے کا دورہ کیا۔ حماس کی اعلی سطحی رہنماؤں نے لبنان میں سوڈانی سفیر احمد حسن اور قونصل جنرل سمیر بابتوت اور دیگر سفارت کاروں سے تفصیلی ملاقات کی۔
محمود صدیق، مشھور عبد الحلیم، جہاد طہ، محمود طہ اور حماس کے دیگر رہنماؤں نے دو ہفتے قبل اسرائیل کی جانب سے سوڈانی آرڈیننس فیکٹری پر حملے کی شدید مذمت کی۔ حماس رہنماؤں نے کہا کہ یرموک کی اس فیکٹری پر حملہ دراصل فلسطین اور عرب اور پوری اسلامی دنیا پر حملہ ہے جس کی جتنی مذمت کی جائے کم ہے۔

حماس کے رہنماؤں نے اس موقع پر مسئلہ فلسطین کا ساتھ دینے پر سوڈان کا شکریہ ادا کیا اور فلسطینیوں کے مسلمہ حقوق کے لیے سوڈان کے کردار کو سراہا۔ حماس نے عرب لیگ اور اسلامی تعاون کونسل سے مطالبہ کیا کہ اسرائیل کی جانب سے دہشت گردانہ کارروائیوں پر اس کا مواخذہ کیا جائے۔