مرکز اطلاعات فلسطین کے مطابق حماس کے ایک مرکزی رہ نما نے اپنی شناخت ظاہر نہ کرتے ہوئے بتایا ہے کہ امیر قطر الشیخ تمیم بن حمد آل ثانی کی جانب سے خالد مشعل کے دوحہ سے باہر سفر کرنے پر کوئی پابندی عائد نہیں کی گئی ہے۔ اس نوعیت کی اب تک جتنی بھی خبریں سامنے آئی ہیں وہ تمام بے بنیاد ہیں۔
ذرائع نے”قدس پریس” کو بتایا کہ حماس کے قطر اور دیگر تمام عرب اور مسلمان ممالک کے ساتھ تعلقات باہمی احترام کے رشتے پر قائم ہیں۔ یہ بات قطعی بے بنیاد ہے کہ خالد مشعل کی جانب سے امیرقطر کو اپنے بیرون ملک سفر کی درخواست کی ہے لیکن انہوں نے وہ درخواست منظور نہیں کی۔ ایسی کوئی بھی درخواست نہیں دی گئی ہے۔
خیال رہے کہ حال ہی میں بعض عرب اخبارات نے خبر دی تھی کہ حماس کے جلا وطن لیڈر خالد مشعل نے اپنے میزبان ملک قطر کے امیر کو ایک درخواست دی تھی جس میں انہوں نے قطر سے باہر سفر کی تجویز دی تھی تاہم امیر قطر نے ان کی درخواست مسترد کر دی تھی اور کہا تھا کہ فی الحال حماس رہ نما کے بیرون ملک سفر کے لیے حالات سازگار نہیں ہیں۔