فلسطین نیوز کو موصول ہونے والی اطلاعات کے مطابق حماس کے ترجمان فوزی برھوم نے ایک بیان میں کہا ہے کہ فلسطینی اتھارٹی کے ماتحت سیکیورٹی ادارے مقبوضہ مغربی کنارے کے شہروں میں حماس کے کارکنان، سابق اسیران اور دیگر سیاسی کارکنوں کے خلاف غیرقانونی کریک ڈاؤن جاری رکھے ہوئے ہیں۔ تازہ کریک ڈاؤن کا مقصد حماس کے 29 ویں یوم تاسیس کی تقریبات کے انعقاد کو ناکام بنانا ہے۔
ترجمان کا کہنا ہے کہ عباس ملیشیا نے گذشتہ روز غرب اردن میں حماس Â کے اسیر رہنما جمال الھور کے گھر پرچھاپہ مار کر نہ صرف وہاں توڑپھوڑ کی بلکہ اسیر رہنما کی اہلیہ اور بچیوں کو زدو کوب کیا۔ حماس اس واقعے کی شدید الفاظ میں مذمت کرتی ہے۔ انہوں نے عباس ملیشیا کے اہلکاروں کے ہاتھوں حماس کے کارکن مجاھد الھور کے اغواء کی بھی شدید مذمت کی۔
فوزی برھوم نے فلسطینی اتھارٹی کے سربراہ محمود عباس سے مطالبہ کیا کہ وہ سیکیورٹی اداروں کی طرف سے سیاسی کارکنوں کے خلاف جاری کریک ڈاؤن کانوٹس لیں اور شہریوں کو گرفتار کرنے اور انہیں اذیتیں دینے کا سلسلہ بند کرائیں۔