مرکز اطلاعات فلسطین کے مطابق حماس کے سیاسی شعبے کے سینیر رکن عزت الرشق نے اپنے ایک بیان میں کہا کہ مصری حکومت کی جانب سے رفح گذرگاہ پر فلسطینی مسافروں کے ساتھ توہین آمیز سلوک، انہیں حراست میں لینا اور سرحد سے آر پار جانے پر پابندی جیسے واقعات نہایت افسوسناک ہیں۔
عزت الرشق کا کہنا تھا کہ ایک جانب فلسطینی عوام صہیونی ریاست کے ستم اور انسانیت سوز مظالم کا سامنا کررہی ہے اور دوسری جانب مصری حکومت نے بھی فلسطینی شہریوں کی آمد ورفت کے لیے سرحد بند کر رکھی ہے۔ حماس کا مطالبہ ہے کہ قاہرہ حکومت رفح گذرگاہ کو مستقل بنیادوں پر کھولنے کا اہتمام کرے۔
خیال رہے کہ مصری حکام کی جانب سے کل اتوار اور آج سوموار کے روز رفح گذرگاہ کو عارضی طور پر کھولنے کا اعلان کیا ہے۔ گذشتہ روز غزہ کی پٹی سے آٹھ بسیں مسافروں کو لے کر قاہرہ روانہ ہوئی تھیں۔
رفح گذرگاہ گذشتہ چوبیس اکتوبر سے بند ہے جس کے نتیجے میں ہزاروں فلسطینی سرحد کی دونوں جانب پھنسے ہوئے ہیں۔ ان میں طلباء اور مریض بھی شامل ہیں۔
بشکریہ:مرکزاطلاعات فلسطین