مرکزاطلاعات فلسطین کے مطابق حماس کے ترجمان سامی ابو زھری نے اپنے ایک بیان میں کہا ہے کہ رفح کے عوام سنگین مشکلات کا سامنا کررہے ہیں۔ اب وقت آگیا ہے کہ ان کی مشکلات دور کرنے کے لیے عالمی برادری دل کھول کرامداد فراہم کرے۔ انہوں نے عالمی امدادی اداروں سے اپیل کی کہ وہ رفح میں وہاں کی مقامی آبادی کی صحت کی بنیادی ضرورت کے پیش نظر استپال کےقیام میں فلسطینی حکومت کی مدد کریں۔
ابو زھری کا کہنا تھا کہ پچھلے سال پچاس روز تک غزہ پر اسرائیل کی مسلط کی گئی وحشیانہ جنگ کے دوران رفح کے 162 شہری شہید ہوگئے تھے۔ شہداء میں نصف زخمی تھے جو بروقت طبی امداد نہ ملنے کے باعث جام شہادت نوش کرگئے۔ اگر رفح میں اسپتال ہوتا تو زخمیوں کی زندگیاں بچائی جاسکتی تھیں۔
خیال رہے کہ جنوبی غزہ کے علاقے رفح میں اسپتال کی عدم موجودگی کے باعث وہاں کے ہزاروں شہریوں کو دوسرے علاقوں میں صحت کی سہولیات کے لیے جانا پڑتا ہے۔
بشکریہ:مرکزاطلاعات فلسطین